ತರಕಾರಿ ಹಣ್ಣಿನ ಸಿಪ್ಪೆ ಗಳಿಂದ ಮಾಡಬಹುದಾದ ರುಚಿಯಾದ ಅಡುಗೆಗಳು – ಭಾಗ 1

ಬೇಕಾಗುವ ಪದಾರ್ಥಗಳು:

• ಕಿತ್ತಳೆ ಸಿಪ್ಪೆ  1 ಕಪ್
• ಕಡ್ಲೆಬೇಳೆ 1 ಚಮಚ
• ಉದ್ದಿನಬೇಳೆ 1 ಚಮಚ
• ಒಣಮೆಣಸು 10
• ಶುಂಠಿ 1 ಇಂಚು
• ತೆಂಗಿನಕಾಯಿ ತುರಿ ½ ಕಪ್
• ಹುಣಸೆ ಹಣ್ಣು ಸ್ವಲ್ಪ
• ಬೆಲ್ಲ 1 ಚಮಚ
• ಕರಿಬೇವು
• ಸಾಸಿವೆ ½ ಚಮಚ
• ಹಿಂಗು ಸ್ವಲ್ಪ
• ಎಣ್ಣೆ
• ಉಪ್ಪು

ಮಾಡುವ ವಿಧಾನ
ಮೊದಲಿಗೆ ಒಂದು ಬಾಣಲೆಗೆ ಎರಡು ಚಮಚ ಎಣ್ಣೆ ಹಾಕಿ, ಕಾದ ನಂತರ ಒಂದು ಚಮಚ ಕಡ್ಲೆಬೇಳೆ, ಒಂದು ಚಮಚ ಉದ್ದಿನಬೇಳೆ ಹಾಕಿ ಕೆಂಪಾಗುವ ತನಕ ಹುರಿಯಬೇಕು. ನಂತರ ಒಣಮೆಣಸಿನಕಾಯನ್ನು ಸೇರಿಸಿ ಹುರಿಯಬೇಕು. ನಂತರ ಈ ಹುರಿದ ಪದಾರ್ಥಗಳನ್ನು ಮಿಕ್ಸಿ ಜಾರಿಗೆ ಹಾಕಿಕೊಳ್ಳಬೇಕು. ನಂತರ ಅದೇ ಬಾಣಲೆಗೆ ಮತ್ತೆ ಎರಡು ಚಮಚ ಎಣ್ಣೆ ಹಾಕಿ ಸಣ್ಣಗೆ ಹೆಚ್ಚಿದ ಶುಂಠಿ ಹಾಗೂ ಕಿತ್ತಳೆ ಹಣ್ಣಿನ ಸಿಪ್ಪೆಯನ್ನು ಹಾಕಿ ಹಸಿ ವಾಸನೆ ಹೋಗಿ, ಕಿತ್ತಳೆಯ ಸಿಪ್ಪೆ ಕೆಂಪಾಗುವ ತನಕ ಹುರಿಯಬೇಕು. ಹುರಿದ ಶುಂಠಿ ಹಾಗೂ ಕಿತ್ತಳೆ ಸಿಪ್ಪೆಯನ್ನು ಕೂಡ ಅದೇ ಮಿಕ್ಸಿ ಜಾರಿಗೆ ಹಾಕಿ ಒಮ್ಮೆ ರುಬ್ಬಿಕೊಳ್ಳಬೇಕು. ನಂತರ ಅದೇ ಮಿಕ್ಸಿ ಜಾರಿಗೆ ಹುಣಸೆಹಣ್ಣು, ಬೆಲ್ಲ, ರುಚಿಗೆ ತಕ್ಕಷ್ಟು ಉಪ್ಪು ಹಾಗೂ ಕಾಯಿತುರಿಯನ್ನು ಹಾಕಿ ಸ್ವಲ್ಪ ನೀರಿನೊಂದಿಗೆ ತರಿ ತರಿಯಾಗಿ ರುಬ್ಬಿಕೊಳ್ಳಬೇಕು. ಹಾಗೆಯೇ ಒಂದು ಪಾತ್ರೆಗೆ ವರ್ಗಯಿಸಿಕೊಳ್ಳಬೇಕು. ಕೊನೆಯಲ್ಲಿ ಹಿಂಗು, ಸಾಸಿವೆ ಹಾಗೂ ಕರಿಬೇವಿನ ಒಗ್ಗರಣೆ ನೀಡಿದರೆ ಕಿತ್ತಳೆ ಸಿಪ್ಪೆಯ ಚಟ್ನಿ ಸವಿಯಲು ಸಿದ್ದವಾಗುತ್ತದೆ.

ಪ್ರಯೋಜನಗಳು

• ಕಿತ್ತಳೆ ಹಣ್ಣು ಉತ್ತಮ ವಿಟಮಿನ್ ಸಿ ಯ ಗಣಿಯಾಗಿದ್ದು, ಕಿತ್ತಳೆ ಸಿಪ್ಪೆ ಕೂಡ ಅದೇ ಆರೋಗ್ಯಕರ ಅಂಶಗಳನ್ನು ಹೊಂದಿದೆ.
• ಚರ್ಮದ ಉತ್ತಮ ಆರೋಗ್ಯಕ್ಕೆ ಸಹಕಾರಿಯಾಗಿದೆ.