ಹಲವು ಆರೋಗ್ಯ ಸಮಸ್ಯೆಗಳಿಗೆ ರಾಮಬಾಣ ಕಾಳುಮೆಣಸು ಮನೆಮದ್ದು (Powerful Black Pepper Home Remedies for Common Health Issues)

Spread the love

ಕಾಳುಮೆಣಸಿನ ಕಾಯಿ ಒಂದು ಉತ್ತಮ ಸಾಂಬಾರು ಪದಾರ್ಥ. ಬಳ್ಳಿಯಲ್ಲಿ ಬೆಳೆಯುವ ಈ ಕಾಳುಮೆಣಸು, ರೈತರಿಗೆ ಉತ್ತಮ ಲಾಭ ಕೊಡುವ ಕೃಷಿಯಾಗಿದೆ. ಸ್ವಲ್ಪ ಕಾಳುಮೆಣಸಿನ ಪುಡಿಯನ್ನು ಆಹಾರಕ್ಕೆ ಸೇರಿಸಿದರೆ ಸಾಕು, ಆಹಾರವು ತನ್ನದೇ ವಿಭಿನ್ನ ರೀತಿಯ ಸ್ವಾದವನ್ನು ನೀಡುತ್ತದೆ. ಇಂದಿನ ಲೇಖನದಲ್ಲಿ ಕಾಳುಮೆಣಸಿನ ಪರಿಚಯ, ವೈಜ್ಞಾನಿಕ ವಿಚಾರಗಳು ಹಾಗೂ ಆರೋಗ್ಯಕರ ಮನೆಮದ್ದುಗಳ ಬಗೆಗಿನ ಮಾಹಿತಿಗಳನ್ನು ವಿಶ್ಲೇಷಿಸೋಣ.

ಕಾಳುಮೆಣಸಿನ ಕೆಲವು ವೈಜ್ಞಾನಿಕ ವಿಚಾರಗಳು

ವೈಜ್ಞಾನಿಕ ಹೆಸರು – ಪೈಪರ್ ನೈಗ್ರಮ್ (Piper nigrum)
ಆಂಗ್ಲ ಹೆಸರು – ಬ್ಲ್ಯಾಕ್ ಪೆಪ್ಪರ್ ( black pepper )

ಕಾಳುಮೆಣಸಿನ ಖಾರದ ರುಚಿಗೆ ಮುಖ್ಯವಾಗಿಪೈಪರಿನ್ (Piperine) ಕಾರಣವಾಗುತ್ತದೆ. ಇದು ಕಾಳುಮೆಣಸಿಗೆ ವಿಶೇಷ ಖಾರದ ರುಚಿಯನ್ನು ನೀಡುತ್ತದೆ. ಹಾಗೆಯೇ ಕಾಳುಮೆಣಸಿನಲ್ಲಿ ವಿಟಮಿನ್ ಎ, ವಿಟಮಿನ್ ಇ, ವಿಟಮಿನ್ ಕೆ, ವಿಟಮಿನ್ ಬಿ6, ಕ್ಯಾಲ್ಸಿಯಂ, ತಾಮ್ರ, ಕಬ್ಬಿಣ, ಪೊಟ್ಯಾಸಿಯಂ, ಮ್ಯಾಂಗನೀಸ್, ರಂಜಕ ಇನ್ನೂ ಅನೇಕ ಖನಿಜಗಳು ಹೇರಳವಾಗಿದೆ.

ಇನ್ನೂ ಕಾಳುಮೆಣಸು ಅನೇಕ ಆರೋಗ್ಯ ಸಮಸ್ಯೆಗಳಿಗೆ ಉತ್ತಮ ಮನೆಮದ್ದಾಗಿದೆ. ಇದು ಅಜೀರ್ಣ, ಹೊಟ್ಟೆ ಉಬ್ಬರ, ಶೀತ, ಕೆಮ್ಮು, ಅತಿಸಾರಗಳಂತಹ ಸಮಸ್ಯೆಗಳಿಗೆ ಉತ್ತಮ ಪರಿಹಾರಗಳನ್ನು ನೀಡುತ್ತದೆ. ಅಂತಹ ಉತ್ತಮ ಪರಿಹಾರಗಳ ಬಗ್ಗೆ ಈಗ ಅರಿಯೋಣ.

ಕಾಳುಮೆಣಸಿನ ಆರೋಗ್ಯಕರ ಮನೆಮದ್ದುಗಳು (Black Pepper Home Remedies)

ಸುಲಭ ಜೀರ್ಣಕ್ರಿಯೆಗೆ ಕಾಳುಮೆಣಸಿನ ಸೇವನೆಯು ಉತ್ತಮವಾಗಿದೆ.

ನಾವು ಸೇವಿಸಿದ ಆಹಾರವು ಸುಲಭವಾಗಿ ಜೀರ್ಣವಾಗಲು ಕಾಳುಮೆಣಸಿನ ಸೇವನೆಯು ಉತ್ತಮವಾಗಿದೆ. ಊಟ ಮಾಡುವಾಗ ಮೊದಲನೆಯ ತುತ್ತಿಗೆ, ಒಂದು ಚಮಚ ತುಪ್ಪವನ್ನು ಕಾಯಿಸಿ, ಅದಕ್ಕೆ ಸ್ವಲ್ಪ ಕಾಳುಮೆಣಸಿನ ಪುಡಿ ಹಾಗೂ ಸ್ವಲ್ಪ ಉಪ್ಪನ್ನು ಸೇರಿಸಬೇಕು. ಈ ಮಿಶ್ರಣವನ್ನು ಅನ್ನದ ಮೊದಲ ತುತ್ತಿನ ಮೇಲೆ ಹಾಕಿ ಕಲಸಿ ತಿನ್ನಬೇಕು. ಇದು ಆಜೀರ್ಣ ಸಮಸ್ಯೆಯನ್ನು ದೂರಗೊಳಿಸುತ್ತದೆ. ಸುಲಭ ಜೀರ್ಣಕ್ರಿಯೆಗೆ ಉತ್ತಮವಾಗಿದೆ.
ನಾವು ಶುಭ ಕಾರ್ಯಕ್ರಮಗಳ ಊಟವನ್ನು ಸೇವಿಸಿದ ನಂತರ ಹೊಟ್ಟೆ ತುಂಬಿದ ಭಾವನೆ ಬರುವುದು ಸಹಜ. ಆ ಸಮಯದಲ್ಲಿ ಅರ್ಧ ಲೋಟ ಕಾಳುಮೆಣಸಿನ ಸಾರನ್ನು ಕುಡಿದರೆ, ಸೇವಿಸಿದ ಆಹಾರ ತ್ವರಿತವಾಗಿ ಜೀರ್ಣವಾಗುತ್ತದೆ. ಕಾಳುಮೆಣಸು ಆಜೀರ್ಣಕ್ಕೆ ಉತ್ತಮ ಪರಿಹಾರವನ್ನು ನೀಡುತ್ತದೆ.
ಅಜೀರ್ಣಕ್ಕೆ ಇನ್ನೊಂದು ಉತ್ತಮ ಪರಿಹಾರವೆಂದರೆ- ಒಂದು ಚಮಚ ಕಾಳುಮೆಣಸನ್ನು ಚೆನ್ನಾಗಿ ಹುರಿದುಕೊಳ್ಳಬೇಕು. ಈ ಕಾಳುಮೆಣಸಿನ ಜೊತೆಗೆ ಒಂದು ಹಿಡಿ ತುಳಸಿಯನ್ನು ಎರಡು ದೊಡ್ಡ ಲೋಟ ನೀರಿಗೆ ಹಾಕಿ ಕುದಿಸಬೇಕು. ಚೆನ್ನಾಗಿ ಕುದಿ ಬಂದ ನಂತರ ಒಲೆಯನ್ನು ಆರಿಸಿ, ಜೇನುತುಪ್ಪವನ್ನು ಬೆರೆಸಿ ಕುಡಿಯಬೇಕು. ಇದು ಅಜೀರ್ಣ ನಿವಾರಣೆಗೆ ಉತ್ತಮ ಔಷಧಿಯಾಗಿದೆ.
ಕಾಳುಮೆಣಸು ಹಾಗೂ ಬೆಳ್ಳುಳ್ಳಿಯನ್ನು ಬಳಸಿ ಮಾಡಿದ ಚಟ್ನಿ ಪುಡಿಯನ್ನು ಸೇವಿಸುವುದರಿಂದ ಜೀರ್ಣಕ್ರಿಯೆಯೂ ಉತ್ತಮವಾಗಿರುತ್ತದೆ. ಹಾಗೂ ಇದು ಅರೋಗ್ಯಕ್ಕೂ ಕೂಡ ಉತ್ತಮ ಆಹಾರವಾಗಿದೆ.

ನೆಗಡಿ, ಕೆಮ್ಮಿಗೆ ಕಾಳುಮೆಣಸು ಉತ್ತಮ ಪರಿಹಾರಗಳನ್ನು ನೀಡುತ್ತದೆ.

ಕೆಮ್ಮಿಗೆ ಒಂದು ಉತ್ತಮ ಪರಿಹಾರವೆಂದರೆ, ಕಾಳುಮೆಣಸನ್ನು ಸ್ವಲ್ಪ ಜಜ್ಜಿಕೊಂಡು, ಸ್ವಲ್ಪ ಓಂಕಾಳು, ಎರಡು ಉಪ್ಪಿನ ಹರಳು ಇವು ಮೂರನ್ನು ಬೆರೆಸಿ ಬಾಯಲ್ಲಿಟ್ಟುಕೊಂಡು ರಸವನ್ನು ಸೇವಿಸಬೇಕು. ಇದರಿಂದ ಕೆಮ್ಮು ಕಡಿಮೆಯಾಗುತ್ತದೆ.
ಮಳೆಗಾಲದಲ್ಲಿ ಬರುವ ಸಾಮಾನ್ಯ ನೆಗಡಿ, ಕೆಮ್ಮನ್ನು ಕಡಿಮೆಗೊಳಿಸಲು ಕಾಳುಮೆಣಸಿನ ಕಷಾಯವು ಬಹಳ ಉತ್ತಮವಾಗಿದೆ. ಅರ್ಧ ಚಮಚ ಕಾಳುಮೆಣಸನ್ನು ಚೆನ್ನಾಗಿ ಅರೆದು ಪುಡಿಮಾಡಿಕೊಳ್ಳಬೇಕು. ಅರ್ಧ ಲೋಟ ಹಾಲನ್ನು ಕುದಿಸಿ, ಈ ಅರೆದು ಪುಡಿಮಾಡಿಕೊಂಡಿಟ್ಟ ಕಾಳುಮೆಣಸನ್ನು ಸೇರಿಸಿ ಮತ್ತೆ ಕುದಿಸಬೇಕು. ಈ ಕಷಾಯವನ್ನು ಕುಡಿದರೆ ಕೆಮ್ಮು, ನೆಗಡಿ, ಜ್ವರದಂತಹ ಸಮಸ್ಯೆಗಳು ಕಡಿಮೆಯಾಗುತ್ತದೆ. ಹಾಗೆಯೇ ಗಂಟಲಿನ ಉತ್ತಮ ಆರೋಗ್ಯಕ್ಕೂ ಉತ್ತಮವಾಗಿದೆ.
ಕಾಳುಮೆಣಸನ್ನು ಚೆನ್ನಾಗಿ ಕುಟ್ಟಿ ಪುಡಿ ಮಾಡಿಕೊಳ್ಳಬೇಕು. ಈ ಪುಡಿಯನ್ನು ಜೇನುತುಪ್ಪದೊಡನೆ ಬೆರೆಸಿ, ಸೇವಿಸುವುದರಿಂದ ನೆಗಡಿ ಹಾಗೂ ಕೆಮ್ಮಿಗೆ ಉತ್ತಮ ಪ್ರಯೋಜನಗಳನ್ನು ನೀಡುತ್ತದೆ.
ಕಾಳುಮೆಣಸಿನ ಸೂಪ್ ನ್ನು ಕುಡಿಯುವುದು ನೆಗಡಿಗೆ ಅತಿ ಉತ್ತಮವಾಗಿದ್ದು, ಅರೋಗ್ಯಕ್ಕೂ ಕೂಡ ಉತ್ತಮವಾಗಿದೆ.

ಮೂಲವ್ಯಾಧಿಗೂ ಕೂಡ ಕಾಳುಮೆಣಸು ಉತ್ತಮ ಪರಿಹಾರವನ್ನು ನೀಡುತ್ತದೆ.

ಮೂಲವ್ಯಾಧಿಗೆ ಉತ್ತಮ ಪರಿಹಾರವೆಂದರೆ ಕಾಳುಮೆಣಸು ಹಾಗೂ ಬಾಲಮೆಣಸನ್ನು ಎರಡನ್ನು ಚೆನ್ನಾಗಿ ಒಣಗಿಸಿ, ಪುಡಿಮಾಡಿಕೊಳ್ಳಬೇಕು. ಈ ಪುಡಿಯನ್ನು ಸ್ವಲ್ಪ ತುಪ್ಪದ ಜೊತೆಗೆ ಬೆರೆಸಿ ಸೇವಿಸುವುದರಿಂದ ಮೂಲವ್ಯಾಧಿ ಸಮಸ್ಯೆಗಳು ಕಡಿಮೆಯಾಗುತ್ತದೆ. ಇದು ಮೂಲವ್ಯಾಧಿಗೆ ಉತ್ತಮ ಪರಿಹಾರವಾಗಿದೆ.

ಮಲೇರಿಯಾ ಜ್ವರವು ಬಂದಾಗ, ಕಾಳುಮೆಣಸಿನ ಸೇವನೆಯು ಜ್ವರದ ನಿವಾರಣೆಗೆ ಉತ್ತಮವಾಗಿದೆ.

ಮಲೇರಿಯಾ ಜ್ವರದ ಪರಿಣಾಮವನ್ನು ಕಡಿಮೆಗೊಳಿಸಲು ಕಾಳುಮೆಣಸು ಉತ್ತಮ ಪರಿಹಾರವನ್ನು ನೀಡುತ್ತದೆ. ಒಂದು ಲೋಟ ನೀರಿಗೆ ಒಂದು ಚಮಚ ಕಾಳುಮೆಣಸು, ಆರು ಎಸಳು ಬೆಳ್ಳುಳ್ಳಿ ಇವೆರಡನ್ನು ಜಜ್ಜಿ ಹಾಕಬೇಕು. ನಂತರ ಚೆನ್ನಾಗಿ ಕುದಿಸಿಕೊಂಡು, ಸೋಸಿಕೊಳ್ಳಬೇಕು. ಈ ಸೋಸಿಕೊಂಡ ಕಷಾಯಕ್ಕೆ ಜೇನುತುಪ್ಪವನ್ನು ಬೆರೆಸಿ ದಿನಕ್ಕೆ ಮೂರು ಬಾರಿ ಕುಡಿಯಬೇಕು. ಇದು ಮಲೇರಿಯಾ ಜ್ವರದ ನಿವಾರಣೆಗೆ ಅತಿ ಉತ್ತಮವಾಗಿದೆ. ಹಾಗೆಯೇ ಈ ಕಷಾಯವನ್ನು ನಿತ್ಯ ಒಮ್ಮೆ ಕುಡಿಯುವುದರಿಂದ ಮೂತ್ರವಿಸರ್ಜನೆಯ ಸಮಯದಲ್ಲಿ ಉಂಟಾಗುವ ಸಮಸ್ಯೆಗಳು ಕೂಡ ದೂರವಾಗುತ್ತದೆ. ಹಾಗೆಯೇ ಮೂತ್ರವಿಸರ್ಜನೆ ಸುಲಭವಾಗಿ ಆಗುತ್ತದೆ.
ಮಲೇರಿಯಾ ಜ್ವರದ ನಿವಾರಣೆಗೆ ಇನ್ನೊಂದು ಉತ್ತಮ ಉಪಾಯವೆಂದರೆ ಕಾಳುಮೆಣಸು, ಓಂಕಾಳು ಹಾಗೂ ಅಮೃತಬಳ್ಳಿ ಇವುಗಳನ್ನು ಸ್ವಲ್ಪ ನೀರಿನೊಂದಿಗೆ ಅರೆದುಕೊಳ್ಳಬೇಕು. ನಂತರ ಈ ಮಿಶ್ರಣವನ್ನು ಸ್ವಲ್ಪ ಸೇವಿಸಬೇಕು. ಇದು ಮಲೇರಿಯಾ ಜ್ವರವನ್ನು ನಿವಾರಿಸಲು ಸಹಾಯಕವಾಗುತ್ತದೆ.

ಕೂದಲು ಉದುರುವಿಕೆಯ ಸಮಸ್ಯೆ ಇದ್ದಲ್ಲಿ ಕಾಳುಮೆಣಸು ಉತ್ತಮ ಪರಿಹಾರಗಳನ್ನು ನೀಡುತ್ತದೆ.

ಕೆಲವರಿಗೆ ಅನೇಕ ಸಮಸ್ಯೆಗಳು ಹಾಗೂ ರೋಗಗಳ ಪರಿಣಾಮವಾಗಿ ಕೂದಲು ಉದುರುವ ಸಮಸ್ಯೆಗಳು ಉಂಟಾಗುತ್ತದೆ. ಕೂದಲು ಉದುರುವ ಈ ಸಮಯದಲ್ಲಿ ಕಾಳುಮೆಣಸಿನಸನ್ನು ನೀರಿನಲ್ಲಿ ಅರೆದು ತಲೆ ಬುರುಡೆಗೆ ಹಚ್ಚಬೇಕು. ಇದು ಕೂದಲ ಬೆಳವಣಿಗೆಗೆ ವಿಶೇಷ ರೀತಿಯಲ್ಲಿ ಸಹಾಯ ಮಾಡುತ್ತದೆ. ಕೂದಲ ಬೆಳವಣಿಗೆಗೆ ಇದು ಉಪಕಾರಿಯಾಗಿದೆ.

ಗಂಟಲಿನ ನೋವು ಹಾಗೂ ಗಂಟಲು ಹುಣ್ಣಿನ ಸಮಸ್ಯೆಗಳಿಗೆ ಕಾಳುಮೆಣಸು ಉತ್ತಮ ಪರಿಹಾರಗಳನ್ನು ನೀಡುತ್ತದೆ.

ಗಂಟಲಿನ ನೋವು ಹಾಗೂ ಹುಣ್ಣಿನ ಸಮಸ್ಯೆಗಳು ಇದ್ದಾಗ ಒಂದು ಲೋಟ ನೀರಿನಲ್ಲಿ ಕಾಳುಮೆಣಸು ಹಾಗೂ ಬೆಳ್ಳುಳ್ಳಿಯನ್ನು ಜಜ್ಜಿ ಹಾಕಿ, ಕುದಿಸಬೇಕು. ಚೆನ್ನಾಗಿ ಕುದಿ ಬಂದ ನಂತರ ಓಲೆ ಆರಿಸಿಕೊಂಡು, ಸ್ವಲ್ಪ ಉಪ್ಪನ್ನು ಸೇರಿಸಿಕೊಂಡು ಕಲಸಿಕೊಂಡು, ಸೋಸಿಕೊಳ್ಳಬೇಕು. ಈ ಕಷಾಯವು ಸ್ವಲ್ಪ ತಣಿದ ನಂತರ ಗಂಟಲಿಗೆ ಹಾಕಿ ಮುಕ್ಕಳಿಸಬೇಕು. ನಂತರ ಉಗುಳಿ, ಮತ್ತೆ ಮಾಡಬೇಕು. ಹೀಗೆ ಮಾಡುವುದರಿಂದ ಗಂಟಲಿನ ನೋವು ಹಾಗೂ ಹುಣ್ಣುಗಳು ಬೇಗನೆ ಗುಣವಾಗುತ್ತದೆ.

ಹಲ್ಲು ನೋವಿಗೂ ಕಾಳುಮೆಣಸಿನ ಪೇಸ್ಟ್ ಉತ್ತಮವಾಗಿದೆ.

ಹಲ್ಲು ನೋವಿರುವಾಗ, ಕಾಳುಮೆಣಸನ್ನು ನುಣ್ಣಗೆ ಅರೆದುಕೊಂಡು, ಈ ಮಿಶ್ರಣವನ್ನು ವಸಡಿಗೆ ಸವರಿಕೊಳ್ಳಬೇಕು. ಐದು ನಿಮಿಷಗಳ ನಂತರ ಮತ್ತೆ ತೊಳೆದುಕೊಳ್ಳಬೇಕು. ಇದು ತ್ವರಿತವಾಗಿ ಹಲ್ಲಿನ ನೋವನ್ನು ನಿವಾರಿಸುತ್ತದೆ.

ಬಾಣಂತಿಯರ ಆರೋಗ್ಯಕ್ಕೆ ಕೂಡ ಕಾಳುಮೆಣಸು ಉಪಯುಕ್ತವಾಗಿದೆ.

ಬಾಣಂತಿಯರ ದೇಹದ ಉಷ್ಣವನ್ನು ಕಾಪಾಡುವಲ್ಲಿ ಕಾಳುಮೆಣಸು ಉತ್ತಮವಾಗಿದೆ. ಬಾಣಂತನದ ಸಮಯದಲ್ಲಿ ಕಾಳುಮೆಣಸಿನ ಸಾರನ್ನು ಸೇವಿಸುವುದು ಅತಿ ಉತ್ತಮವಾಗಿದೆ. ಈ ಆಹಾರದಿಂದ ಬಾಣಂತಿಯರಿಗೆ ಯಾವುದೇ ರೀತಿಯ ಸೋಂಕುಗಳು ಉಂಟಾಗುವುದಿಲ್ಲ.

ಕೊಲೆಸ್ಟ್ರೋಲ್ ಮಟ್ಟವನ್ನು ನಿಯಂತ್ರಿಸುವಲ್ಲಿ ಕಾಳುಮೆಣಸು ಉತ್ತಮವಾಗಿದೆ.

ಕಾಳುಮೆಣಸಿನಲ್ಲಿ ಅಧಿಕ ಪ್ರಮಾಣದ ಪೊಟ್ಯಾಸಿಯಂ ಅಂಶವಿದ್ದು, ಇದು ಹೃದಯದ ಆರೋಗ್ಯಕ್ಕೆ ಅತಿ ಉತ್ತಮವಾಗಿದೆ. ಹಾಗೆಯೇ ಇದು ಅಧಿಕ ರಕ್ತದ ಒತ್ತಡವನ್ನು ಹಾಗೂ ಹೃದಯ ಬಡಿತವನ್ನು ಕೂಡ ನಿಯಂತ್ರಿಸುತ್ತದೆ.

ಹೀಗೆ ಕಾಳುಮೆಣಸು ಅನೇಕ ಉಪಯೋಗಗಳನ್ನು ನಮಗೆ ನೀಡುತ್ತದೆ. ದೇಹದಲ್ಲಿನ ಸಕ್ಕರೆ ಅಂಶವನ್ನು ನಿಯಂತ್ರಿಸುವ ಗುಣಗಳು ಕೂಡ ಕಾಳುಮೆಣಸಿನಲ್ಲಿದೆ, ಹಾಗಾಗಿ ಇದು ಮಧುಮೇಹಿಗಳಿಗೆ ಉತ್ತಮವಾಗಿದೆ. ಅಲ್ಲದೇ ಕಾಳುಮೆಣಸು ಕಡಿಮೆ ಕ್ಯಾಲೋರಿ ಹೊಂದಿರುವ ಆಹಾರವಾಗಿದ್ದು, ತೂಕ ಇಳಿಕೆಯಲ್ಲೂ ಕೂಡ ಉತ್ತಮವಾಗಿದೆ. ಕಾಳುಮೆಣಸಿನಲ್ಲಿ ವಿಟಮಿನ್ ಸಿ ಹಾಗೂ ವಿಟಮಿನ್ ಎ ಹೇರಳವಾಗಿದ್ದು, ಇದು ದೇಹದಲ್ಲಿನ ರೋಗನಿರೋಧಕ ಶಕ್ತಿಯನ್ನು ವೃದ್ಧಿಸುತ್ತದೆ. ಇನ್ನೂ ಅನೇಕ ಉಪಯೋಗಗಳನ್ನು ನಾವು ಕಾಳುಮೆಣಸಿನಿಂದ ಪಡೆದುಕೊಳ್ಳಬಹುದು. ಇಂತಹ ಉತ್ತಮ ಅರೋಗ್ಯವರ್ಧಕ ಹಾಗೂ ರೋಗನಿರೋಧಕ ಶಕ್ತಿಯನ್ನು ಹೊಂದಿರುವ ಕಾಳುಮೆಣಸಿನ ಉಪಯೋಗಗಳನ್ನು ಅರಿತು, ಸಮಸ್ಯೆಗಳಿಂದ ಮುಕ್ತಿ ಪಡೆಯಿರಿ ಎಂಬುದು ಈ ಲೇಖನದ ಆಶಯ.

ನಿಮ್ಮ ಅನಿಸಿಕೆ, ಮತ್ತು ಅಭಿಪ್ರಾಯಗಳನ್ನು ಕಾಮೆಂಟ್ ಮೂಲಕ ಹಂಚಿಕೊಳ್ಳಿ! ಹಾಗೂ, ಹೆಚ್ಚು ಮಾಹಿತಿಪೂರ್ಣ ಲೇಖನಗಳಿಗಾಗಿ GruhaSnehi.com ಭೇಟಿ ನೀಡಿ.

ಡಿಸ್ಕ್ಲೈಮರ್: ಈ ಬ್ಲಾಗ್‌ನಲ್ಲಿ ನೀಡಿರುವ ಮಾಹಿತಿಯು ಕೇವಲ ಸಾಮಾನ್ಯ ಉದ್ದೇಶಗಳಿಗಾಗಿ. ವೈದ್ಯಕೀಯ, ಹಣಕಾಸು, ಹೂಡಿಕೆ ಅಥವಾ ಕಾನೂನು ಸಲಹೆಗೆ ತಜ್ಞರನ್ನೇ ಸಂಪರ್ಕಿಸಿ. ಈ ಬ್ಲಾಗ್‌ನಲ್ಲಿ ಶೇರ್ ಮಾಡಲಾದ ಯಾವುದೇ ಆಹಾರ ಅಥವಾ ಪಾಕವಿಧಾನಗಳನ್ನು ಬಳಸುವ ಮೊದಲು, ನಿಮ್ಮ ಆರೋಗ್ಯ ಸ್ಥಿತಿಗೆ ಅನುಗುಣವಾಗಿ ಅಥವಾ ಯಾವುದೇ ಅಲರ್ಜಿಯ ಕುರಿತು ತಜ್ಞರ ಸಲಹೆ ಪಡೆಯಲು ಶಿಫಾರಸು ಮಾಡಲಾಗುತ್ತದೆ. ಈ ಪೋಸ್ಟ್‌ನಲ್ಲಿ ಬಳಸಲಾದ ಯಾವುದೇ ಚಿತ್ರಗಳು ಅಥವಾ ಲೋಗೋಗಳು ಆಯಾ ಮಾಲೀಕರ ಆಸ್ತಿಯಾಗಿದ್ದು, ವಿವರಣಾತ್ಮಕ ಉದ್ದೇಶಗಳಿಗಾಗಿ ಮಾತ್ರ ಬಳಸಲಾಗುತ್ತದೆ.

Spread the love