ಆರೋಗ್ಯಕರ ಸಲಾಡ್ ಮತ್ತು ಕೋಸಂಬರಿಗಳ ರೆಸಿಪೀಸ್ (Healthy Salad recipes) | ಮೊಳಕೆ ಮೆಂತ್ಯ ಸಲಾಡ್, ಕಾಮಕಸ್ತೂರಿ ಬೀಜದ ಸಲಾಡ್

ನಮ್ಮ ಅರೋಗ್ಯವು ನಾವು ಸೇವಿಸುವ ಆಹಾರದ ಮೇಲೆ ನೇರವಾಗಿ ಅವಲಂಬಿತವಾಗಿದೆ. ಸುಲಭವಾಗಿ ಜೀರ್ಣವಾಗುವ ಆಹಾರಗಳು, ದೇಹಕ್ಕೆ ಉತ್ತಮ ಶಕ್ತಿಯನ್ನು ಒದಗಿಸಿ, ಅರೋಗ್ಯವನ್ನು ಉತ್ತಮವಾಗಿರಿಸುತ್ತದೆ. ಅದೇ ಜೀರ್ಣವಾಗಲು ಕಷ್ಟವಾಗುವ ಆಹಾರಗಳು, ದೇಹದಲ್ಲಿ ಬೇಡವಾದ ಕೊಬ್ಬನ್ನು ಹೆಚ್ಚಿಸಿ, ದೇಹದ ಸಮತೋಲನವನ್ನು ಹದಗೆಡಿಸುತ್ತದೆ. ಹಾಗಾಗಿ ನಾವು ಒಂದು ಹೊತ್ತು ದೇಹಕ್ಕೆ ಅವಶ್ಯವಾಗಿರುವ ಹಸಿರು ತರಕಾರಿ, ಸೊಪ್ಪು ಹಾಗೂ ಕಾಳುಗಳ ಸಲಾಡ್ ಅಥವಾ ಕೋಸಂಬರಿಗಳನ್ನು ತಯಾರಿಸಿ ತಿನ್ನುವುದು ಉತ್ತಮವಾಗಿದೆ, ಇದು ಜೀರ್ಣಕ್ರಿಯೆಯನ್ನು ಸುಲಭಗೊಳಿಸಿ, ಉತ್ತಮ ಆರೋಗ್ಯಕ್ಕೆ ನಾಂದಿಯಾಗುತ್ತದೆ. ಇಂತಹ ಆರೋಗ್ಯಕ್ಕೆ ಅತಿ ಉತ್ತಮವಾಗಿರುವ ವಿವಿಧ ರೀತಿಯ ಸಲಾಡ್ ತಯಾರಿಕಾ ವಿಧಾನಗಳು ಹಾಗೂ ಆರೋಗ್ಯಕರ ಮಾಹಿತಿಗಳ ಬಗ್ಗೆ ಇಂದಿನ ಲೇಖನದಲ್ಲಿ ವಿಶ್ಲೇಷಿಸೋಣ.

ಬೇಕಾಗುವ ಪದಾರ್ಥಗಳು

• ಕಾಮಕಸ್ತೂರಿ ಬೀಜ ¼ ಕಪ್
• ಮೊಳಕೆ ಬಂದ ಹೆಸರುಕಾಳು 1 ಕಪ್
• ಸೌತೆಕಾಯಿ 1
• ಕ್ಯಾರೆಟ್ 1
• ನೆನೆಸಿದ ಒಣದ್ರಾಕ್ಷಿ 15
• ಹಸಿ ಖರ್ಜುರ ½ ಕಪ್
• ಕರಿಮೆಣಸಿನ ಪುಡಿ ½ ಚಮಚ
• ಉಪ್ಪು

ಮಾಡುವ ವಿಧಾನ
ಕಾಮಕಸ್ತೂರಿ ಬೀಜವನ್ನು ಮೂರು ಗಂಟೆಗಳ ಕಾಲ ನೆನೆಸಬೇಕು. ಒಂದು ಪಾತ್ರೆಗೆ ಮೊಳಕೆ ಬಂದ ಹೆಸರು ಕಾಳು, ತುರಿದುಕೊಂಡ ಕ್ಯಾರೆಟ್, ಸಣ್ಣಗೆ ಹೆಚ್ಚಿಕೊಂಡ ಸೌತೆಕಾಯಿ, ಸಣ್ಣಗೆ ಹೆಚ್ಚಿಕೊಂಡ ಖರ್ಜುರ, ನೆನೆಸಿದ ಒಣದ್ರಾಕ್ಷಿ, ಕರಿಮೆಣಸಿನ ಪುಡಿ ಹಾಗೂ ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿಕೊಂಡು ಕಲಸಬೇಕು. ಕೊನೆಯಲ್ಲಿ ಮೇಲಿಂದ ನೆನೆಸಿದ ಕಾಮಕಸ್ತೂರಿ ಬೀಜವನ್ನು ಸೇರಿಸಿಕೊಂಡು ಸವಿಯಬೇಕು. ಅಲ್ಲಿಗೆ ಕಾಮಕಸ್ತೂರಿ ಬೀಜದ ಸಲಾಡ್ ಸವಿಯಲು ಸಿದ್ದವಾಗುತ್ತದೆ.

ಕಾಮಕಸ್ತೂರಿ ಬೀಜದ ಸಲಾಡ್ ಸೇವನೆಯ ಉಪಯೋಗಗಳು

• ಈ ಸಲಾಡ್ ತೂಕವನ್ನು ಕಡಿಮೆಗೊಳಿಸಲು ಅತಿ ಉತ್ತಮವಾಗಿದೆ. ಇದನ್ನು ಉತ್ತಮ ಡಯಟ್ ಫುಡ್ ಅಂತಲೂ ಹೇಳಬಹುದು.
• ಗ್ಯಾಸ್ಟ್ರಿಕ್, ಆಸಿಡಿಟಿಯಂತಹ ಸಮಸ್ಯೆಗಳಿಗೆ ಉತ್ತಮ ಪರಿಹಾರವನ್ನು ನೀಡುತ್ತದೆ, ಹಾಗೆಯೇ ಎದೆ ಉರಿಯನ್ನು ಕೂಡ ಕಡಿಮೆಮಗೋಳಿಸುತ್ತದೆ.
• ಕೊಲೆಸ್ಟ್ರೋಲ್ ಪ್ರಮಾಣವನ್ನು ಕಡಿಮೆಗೊಳಿಸಿ, ರಕ್ತದ ಒತ್ತಡವನ್ನು ಕೂಡ ನಿಯಂತ್ರದಲ್ಲಿಟ್ಟು, ಹೃದಯದ ಅರೋಗ್ಯವನ್ನು ಕಾಪಾಡುತ್ತದೆ.
• ಕಣ್ಣಿನ ಆರೋಗ್ಯಕ್ಕೆ ಕೂಡ ಈ ಸಲಾಡ್ ಉತ್ತಮವಾಗಿದೆ.
• ಸುಲಭ ಜೀರ್ಣಕ್ರಿಯೆಗೂ ಕೂಡ ಈ ಸಲಾಡ್ ಸೇವನೆಯು ಉತ್ತಮವಾಗಿದೆ. ಮಲಬದ್ಧತೆಯ ಸಮಸ್ಯೆಗಳನ್ನು ಕೂಡ ನಿವಾರಿಸುತ್ತದೆ.
• ಕೀಲು ಹಾಗೂ ಮೂಳೆಗಳ ಅರೋಗ್ಯಕ್ಕೂ ಸಹ ಈ ಸಲಾಡ್ ಸೇವನೆಯು ಒಳ್ಳೆಯದಾಗಿದೆ.
• ಈ ಸಲಾಡ್ ದೇಹಕ್ಕೆ ತಂಪು, ದೇಹದ ಉಷ್ಣತೆಯನ್ನು ಕೂಡ ನಿಯಂತ್ರಿಸುತ್ತದೆ.
• ಥೈರಾಯಿಡ್ ಸಮಸ್ಯೆ ಇರುವವರು ಹಾಗೂ ಗರ್ಭಿಣಿ ಮಹಿಳೆಯರು ಕಾಮಕಸ್ತೂರಿ ಬೀಜದ ಸಲಾಡ್ ಅನ್ನು ಸೇವಿಸುವುದು ಬೇಡ.