Categories: ಆರೋಗ್ಯ ಮತ್ತು ಒಳ್ಳೆಯ ಜೀವನಆಹಾರ ಮತ್ತು ಆರೋಗ್ಯ

ಅಕ್ರೋಟ್ ತಿನ್ನುವುದರಿಂದ ಸಿಗುವ ಅಚ್ಚರಿಯ ಆರೋಗ್ಯ ಲಾಭಗಳು (Health Benefits of Walnuts)

Spread the love

ಅಕ್ರೋಟ್ ಅಥವಾ ವಾಲ್ನಟ್ ಎಲ್ಲರಿಗೂ ಇಷ್ಟವಾಗುವ ಆಹಾರ ಪದಾರ್ಥವಾಗಿದ್ದು, ಇದು ಕವಚದೊಳಗೆ ಮೆದುಳಿನ ಆಕಾರದಲ್ಲಿ ಇರುವಂತಹ ಬೀಜವಾಗಿದೆ. ಇನ್ನೂ ಇದು ಪರ್ಷಿಯ ದೇಶದ ಉತ್ತಮ ಬೆಳೆಯಾಗಿದ್ದು, ಪರ್ಷಿಯನ್ ವಾಲ್ನಟ್ ಎಂಬ ಹೆಸರನ್ನು ನಾವು ಕೇಳಿರುತ್ತೇವೆ. ಪ್ರತಿದಿನ ರಾತ್ರಿ ನೆನೆಸಿ, ಮರುದಿನ ಸೇವಿಸುವುದು ಅತಿ ಉತ್ತಮವಾಗಿದ್ದು, ಹಾಗೆಯೇ ಸೇವಿಸಿದರೂ ಕೂಡ ಉತ್ತಮವಾಗಿದೆ. ಅನೇಕ ಆರೋಗ್ಯಕರ ಗುಣಗಳನ್ನು ಹೊಂದಿರುವ ಈ ಅಕ್ರೋಟ್ ಸೇವನೆಯ ಅನೇಕ ಲಾಭಗಳು, ಹಾಗೂ ವೈಜ್ಞಾನಿಕ ವಿಚಾರಗಳ ಬಗ್ಗೆ ಇಂದಿನ ಲೇಖನದಲ್ಲಿ ವಿಶ್ಲೇಷಿಸೋಣ.

ಅಕ್ರೋಟ್ ನ ವೈಜ್ಞಾನಿಕ ವಿಚಾರಗಳು

ವೈಜ್ಞಾನಿಕ ಹೆಸರು – ಜುಗ್ಲಾನ್ಸ್ ರೆಜಿಯಾ (Juglans Regia).

ಆಂಗ್ಲ ಹೆಸರು – ವಾಲ್ನಟ್ (Walnut)

ಅಕ್ರೋಟ್ ನಲ್ಲಿ ಅನೇಕ ಜೀವಸತ್ವ ಹಾಗೂ ಖನಿಜಗಳಿದ್ದು, ಮುಖ್ಯವಾಗಿ ವಿಟಮಿನ್ ಬಿ6 ಹಾಗೂ ಇ ಗಳಿವೆ. ಹಾಗೆಯೇ ಕ್ಯಾಲ್ಸಿಯಂ, ಕಬ್ಬಿಣ, ಪೊಟ್ಯಾಸಿಯಂ, ತಾಮ್ರ, ನಾರು, ಪೊಲೀಕ್ ಆಸಿಡ್, ಫೋಸ್ಪೋರಸ್, ಪ್ರೊಟೀನ್, ಹಾಗೂ ಸತುವನ್ನು ಒಳಗೊಂಡಿದೆ.

ಅಕ್ರೋಟ್ ನಲ್ಲಿ ವಿಶೇಷವಾದ ಔಷಧಿಕ ಗುಣಗಳಿದ್ದು, ಎಲೆ, ತೊಗಟೆ, ತಿರುಳು, ಕಾಂಡ, ಬೀಜ ಎಲ್ಲವೂ ಕೂಡ ಉಪಯುಕ್ತವಾಗಿದೆ.

ಅಕ್ರೋಟ್ ನ ಆರೋಗ್ಯಕರ ಉಪಯೋಗಗಳು

ಚರ್ಮದ ಆರೋಗ್ಯಕ್ಕೆ ಅಕ್ರೋಟ್ ಅತಿ ಉಪಯುಕ್ತವಾಗಿದೆ

ಅಕ್ರೋಟ್ ನಲ್ಲಿ ವಿಟಮಿನ್ ಇ ಅಧಿಕವಾಗಿರುವುದರಿಂದ, ಚರ್ಮದ ಸುಕ್ಕುಗಟ್ಟುವಿಕೆಯನ್ನು ತಡೆಯುತ್ತದೆ. ಹಾಗೆಯೇ ಚರ್ಮದ ಕಾಂತಿಯನ್ನು ಕೂಡ ಹೆಚ್ಚಿಸುತ್ತದೆ. ನಿತ್ಯವು ಅಕ್ರೋಟ್ ಸೇವನೆಯು ಚರ್ಮದ ಆರೋಗ್ಯಕ್ಕೆ ಅತಿ ಉತ್ತಮವಾಗಿದೆ.
ಚರ್ಮದ ಅನೇಕ ಸಮಸ್ಯೆಗಳಾದ ಗಜಕರ್ಣ, ಹುಳಕಡ್ಡಿ, ತುರಿಕೆ ಮುಂತಾದ ಸಮಸ್ಯೆಗಳಿಗೂ ಕೂಡ ಅಕ್ರೋಟ್ ಉತ್ತಮ ಪರಿಹಾರಗಳನ್ನು ನೀಡುತ್ತದೆ. ನಿತ್ಯವು ಅಕ್ರೋಟ್ ನ್ನು ತಿನ್ನುವುದರಿಂದ ಈ ಚರ್ಮದ ಸಮಸ್ಯೆಗಳ ವಿರುದ್ಧ ಹೋರಾಡಲು ಸಹಾಯಕವಾಗಿದೆ. ಅಕ್ರೋಟ್ ಸೇವನೆಯು ಅರೋಗ್ಯವರ್ಧಕವಾಗಿದ್ದು, ರೋಗಗಳ ವಿರುದ್ಧ ಹೋರಾಡುವ ಶಕ್ತಿಯನ್ನು ನೀಡುತ್ತದೆ.

ಅಕ್ರೋಟ್ ಎಣ್ಣೆಯನ್ನು ಚರ್ಮಕ್ಕೆ ಹಚ್ಚಬೇಕು ಇಲ್ಲವೇ ಅಕ್ರೋಟ್ ಎಣ್ಣೆಯ ಸೇವನೆಯು ಕೂಡ ಚರ್ಮದ ಆರೋಗ್ಯಕ್ಕೆ ಅತಿ ಉತ್ತಮವಾಗಿದೆ. ಈ ಅಕ್ರೋಟ್ ಎಣ್ಣೆಯನ್ನು ಹಚ್ಚುವುದು, ಸೇವಿಸುವುದರಿಂದ ಚರ್ಮದ ಕಾಂತಿಯು ಹೆಚ್ಚಾಗುತ್ತದೆ. ಹಾಗೆಯೇ ಸೂರ್ಯನ ಕಿರಣಗಳಿಂದ ಸುಟ್ಟು, ಕಪ್ಪಾದ ಚರ್ಮವನ್ನು ಕೂಡ ರಕ್ಷಿಸುತ್ತದೆ, ಕಪ್ಪು ಕಲೆಗಳನ್ನು ನಿವಾರಿಸುತ್ತದೆ. ಸರ್ವ ಕಾಲದಲ್ಲೂ ಕೂಡ ಚರ್ಮವು ಒಂದೇ ತರಹ ಇರುವಂತೆ ನೋಡಿಕೊಳ್ಳುತ್ತದೆ. ಸೌಂದರ್ಯವರ್ಧಕ ಗುಣಗಳನ್ನು ಹೊಂದಿದೆ, ಚರ್ಮದ ಸುಕ್ಕುಗಳನ್ನು ಕೂಡ ಇದು ನಿವಾರಿಸುತ್ತದೆ.

ಮಧುಮೇಹಿಗಳಿಗೂ ಅಕ್ರೋಟ್ ಸೇವನೆ ಉತ್ತಮವಾಗಿದೆ

ಮಧುಮೇಹ ಸಮಸ್ಯೆಗೆ ಅಕ್ರೋಟ್ ಸೇವನೆಯು ಉತ್ತಮವಾಗಿದೆ. ನಿತ್ಯವೂ ಅಕ್ರೋಟ್ ರಾತ್ರಿ ನೆನೆಸಿಟ್ಟು, ಮರುದಿನ ಬೆಳೆಗ್ಗೆ ತಿನ್ನಬೇಕು. ಇದು ಸಕ್ಕರೆ ಖಾಯಿಲೆ ಬಾರದಂತೆ ತಡೆಯಲು ಉತ್ತಮವಾಗಿದೆ. ಹಾಗೆಯೇ ಈಗಾಗಲೇ ಸಕ್ಕರೆ ಖಾಯಿಲೆ ಇರುವವರು ಕೂಡ ಈ ನೆನೆಸಿದ ಅಕ್ರೋಟ್ ಅನ್ನು ತಿನ್ನುವುದರಿಂದ ಮತ್ತೆ ಸಕ್ಕರೆ ಖಾಯಿಲೆ ಹೆಚ್ಚಾಗದಂತೆ ನಿಯಂತ್ರಿಸುತ್ತದೆ. ಮಧುಮೇಹಿಗಳ ಆರೋಗ್ಯಕ್ಕೆ ಅಕ್ರೋಟ್ ಸೇವನೆ ಅತಿ ಉತ್ತಮವಾಗಿದೆ.

ಹೊಟ್ಟೆಗೆ ಸಂಬಂಧಪಟ್ಟ ಸಮಸ್ಯೆಗಳಿಗೆ ಅಕ್ರೋಟ್ ನಿಂದ ಸಿಗುವ ಉತ್ತಮ ಪರಿಹಾರಗಳು

ಹೊಟ್ಟೆಯಲ್ಲಿ ನೋವು, ಅಥವಾ ಸಂಕಟ ಕಂಡುಬಂದಾಗ ಅಕ್ರೋಟ್ ನ ಸಹಾಯವನ್ನು ನಾವು ಪಡೆದುಕೊಳ್ಳಬೇಕು. ಅಕ್ರೋಟ್ ಎಲೆಗಳನ್ನು ಶುಚಿಗೊಳಿಸಿಕೊಂಡು, ಜಗಿದು ತಿನ್ನಬೇಕು. ಇದರಿಂದ ಹೊಟ್ಟೆ ನೋವು ಕಡಿಮೆಯಾಗುತ್ತದೆ. ಅಕ್ರೋಟ್ ಎಲೆಗಳು ಸಿಗದಿದ್ದರೆ ಅಕ್ರೋಟ್ ಅನ್ನು ನೆನೆಸಿ ತಿನ್ನುವುದು ಕೂಡ ಉತ್ತಮವಾಗಿದೆ. ಇದು ಹೊಟ್ಟೆ ನೋವನ್ನು ತ್ವರಿತವಾಗಿ ಕಡಿಮೆಗೊಳಿಸುತ್ತದೆ.
ಹೊಟ್ಟೆಯಲ್ಲಿ ಜಂತು ಹುಳಗಳು ಹೆಚ್ಚಾಗಿದ್ದರೆ ಅಕ್ರೋಟ್ ಬೀಜದ ಸೇವನೆಯಿಂದ ಜಂತು ಹುಳಗಳನ್ನು ನಿವಾರಿಸಿಕೊಳ್ಳಬಹುದು.

ತಾಯಿಯ ಎದೆ ಹಾಲನ್ನು ನಿಲ್ಲಿಸಲು ಅಕ್ರೋಟ್ ಉತ್ತಮ ಮದ್ದಾಗಿದೆ

ತಾಯಿಯ ಎದೆ ಹಾಲನ್ನು ನಿಲ್ಲಿಸಲು ಅಕ್ರೋಟ್ ಉತ್ತಮ ಪರಿಹಾರಗಳನ್ನು ನೀಡುತ್ತದೆ. ಅಕ್ರೋಟ್ ಮರದ ತೊಗಟೆಯನ್ನು ತೆಗೆದುಕೊಂಡು ಶುಚಿಗೊಳಿಸಿಕೊಳ್ಳಬೇಕು. ಈ ತೊಗಟೆಯನ್ನು ಸ್ವಲ್ಪ ಜಜ್ಜಿಕೊಂಡು, ಒಂದು ಲೋಟ ನೀರಿಗೆ ಹಾಕಿ ಚೆನ್ನಾಗಿ ಕುದಿಸಿಕೊಳ್ಳಬೇಕು. ಇಟ್ಟ ನೀರು ಅರ್ಧದಷ್ಟು ಇಂಗಿದ ಮೇಲೆ ಓಲೆ ಅರಿಸಿಕೊಂಡು, ಶೋಧಿಸಿ ಕುಡಿಯಬೇಕು. ಈ ಕಷಾಯ ಸೇವನೆಯಿಂದ ಎದೆಯ ಹಾಲಿನ ಉತ್ಪತ್ತಿಯಾಗುವುದು ನಿಲ್ಲುತ್ತದೆ.

ಮಲಬದ್ಧತೆ ಹಾಗೂ ಮೂಲವ್ಯಾಧಿಗೆ ಅಕ್ರೋಟ್ ಉತ್ತಮ ಪರಿಹಾರಗಳನ್ನು ನೀಡುತ್ತದೆ.

ಮಲಬದ್ಧತೆ ಸಮಸ್ಯೆಗೆ ಅಕ್ರೋಟ್ ಉತ್ತಮ ಪರಿಹಾರಗಳನ್ನು ನೀಡುತ್ತದೆ. ಅಕ್ರೋಟ್ ಬೀಜದ ಎಣ್ಣೆಯನ್ನು ಎರಡು ಚಮಚ ಸೇವಿಸುವುದರಿಂದ ಮಲಬದ್ಧತೆ ನಿವಾರಣೆಯಾಗುತ್ತದೆ. ಇದರ ಸೇವನೆಯಿಂದ ಭೇದಿಯ ರೂಪದಲ್ಲಿ ಮಲವಿಸರ್ಜನೆಯಾಗುತ್ತದೆ.
ಮಲಬದ್ಧತೆ ನಿವಾರಣೆಯಾದರೆ, ಅದು ಮೂಲವ್ಯಾಧಿ ಸಮಸ್ಯೆಗೆ ಉತ್ತಮ ಪರಿಹಾರವಾಗುತ್ತದೆ. ಅಂತೆಯೇ ಮೂಲವ್ಯಾಧಿ ಸಮಸ್ಯೆ ಇರುವವರು ಅಕ್ರೋಟ್ ಹಣ್ಣಿನ ರಸವನ್ನು ಸೇವಿಸುವುದು ಉತ್ತಮವಾಗಿದೆ. ಇಲ್ಲವೇ ಅಕ್ರೋಟ್ ಬೀಜದ ತಿರುಳನ್ನು ಸೇವಿಸಬೇಕು. ಇದು ಕೂಡ ಮೂಲವ್ಯಾಧಿಗೆ ಉತ್ತಮ ಪರಿಹಾರಗಳನ್ನು ನೀಡುತ್ತದೆ.

ಶರೀರದಲ್ಲಿನ ಕೊಲೆಸ್ಟ್ರೋಲ್ ಮಟ್ಟವನ್ನು ನಿಯಂತ್ರಿಸಲು ಅಕ್ರೋಟ್ ಉತ್ತಮವಾಗಿದೆ.

ಆಕ್ರೋಟ್ ಸೇವನೆಯು ಹೃದಯದ ಆರೋಗ್ಯಕ್ಕೆ ಅತಿ ಉತ್ತಮವಾಗಿದೆ, ಏಕೆಂದರೆ ಅಕ್ರೋಟ್ ಸೇವನೆಯು ದೇಹದಲ್ಲಿನ ಕೆಟ್ಟ ಕೊಲೆಸ್ಟ್ರೋಲ್ ಪ್ರಮಾಣವನ್ನು ಕಡಿಮೆಗೊಳಿಸಿ, ಉತ್ತಮ ಅಥವಾ ಅವಶ್ಯಕ ಕೊಲೆಸ್ಟ್ರೋಲ್ ಪ್ರಮಾಣವನ್ನು ನಿಯಂತ್ರಿಸಿ, ಉಳಿಸಿಕೊಳ್ಳುತ್ತದೆ. ಇದರಿಂದ ರಕ್ತದ ಚಲನೆ ಸರಾಗವಾಗಿ, ಹೃದಯದ ಆರೋಗ್ಯ ಉತ್ತಮವಾಗಿರುತ್ತದೆ.
ಅಕ್ರೋಟ್ ನಲ್ಲಿ ಅಧಿಕವಾದ ಪೊಟ್ಯಾಷಿಯಂ ಹಾಗೂ ನಾರಿನ ಅಂಶವಿದೆ. ಇದು ರಕ್ತದ ಚಲನೆಯನ್ನು ಸರಾಗವಾಗಿಸುತ್ತದೆ. ಇದರಿಂದ ರಕ್ತದ ಒತ್ತಡದಂತಹ ಸಮಸ್ಯೆಗಳು ದೂರವಾಗುತ್ತದೆ. ಉತ್ತಮ ಆಮ್ಲಜನಕ ಪೂರೈಕೆಯಲ್ಲಿ ಕೂಡ ಇದು ಸಹಕಾರಿಯಾಗಿದೆ.

ಮೆದುಳಿನ ಆರೋಗ್ಯಕ್ಕೆ ಅಕ್ರೋಟ್ ಸೇವನೆಯು ಉತ್ತಮವಾಗಿದೆ.

ಅಕ್ರೋಟ್ ಸೇವನೆಯು ಮೆದುಳಿನ ಆರೋಗ್ಯದ ಮೇಲೂ ಕೂಡ ಉತ್ತಮ ಪರಿಣಾಮಗಳನ್ನು ಬೀರುತ್ತದೆ. ಮೆದುಳು ತನ್ನ ಕಾರ್ಯವನ್ನು ಚೆನ್ನಾಗಿ ನಿರ್ವಹಿಸಲು ಸಹಕಾರಿಯಾಗಿದೆ, ಹಾಗೆಯೇ ರಕ್ತನಾಳಗಳಿಗೆ ಆಮ್ಲಜನಕದ ಪೂರೈಕೆಯನ್ನು ಉತ್ತಮವಾಗಿ ಮಾಡುವಂತೆ ನೋಡಿಕೊಳ್ಳುತ್ತದೆ. ಇವೆರಡು ಕಾರ್ಯಗಳು ಸರಾಗವಾಗಿ ಸಾಗುವುದರಿಂದ ಮನಸ್ಸು ಸಮಾಧಾನವನ್ನು ಹೊಂದಿ, ಖಿನ್ನತೆಯಿಂದ ದೂರಗೊಳಿಸುತ್ತದೆ. ಆದ್ದರಿಂದ ಮಾನಸಿಕವಾಗಿ ಖಿನ್ನತೆಯನ್ನು ಹೊಂದಿದವರು ನಿತ್ಯ ಅಕ್ರೋಟ್ ಸೇವಿಸುವುದು ಉತ್ತಮವಾಗಿದೆ. ಇದರಿಂದ ಬಹಳ ಬೇಗ ಚೇತರಿಸಿಕೊಳ್ಳುತ್ತಾರೆ.
ಅಕ್ರೋಟ್ ನಲ್ಲಿ ಒಮೇಗಾ 3 ಆಸಿಡ್ ಅಂಶವು ಇರುವುದರಿಂದ ಇದು ಮನುಷ್ಯನ ಬುದ್ಧಿಶಕ್ತಿ ಹಾಗೂ ಜ್ಞಾಪಕಶಕ್ತಿಯನ್ನು ವೃದ್ಧಿಸಲು ಸಹಾಯಕವಾಗಿದೆ. ಇದರಿಂದ ಮನುಷ್ಯನು ಎಲ್ಲಾ ಚಟುವಟಿಕೆಗಳಲ್ಲಿ ಕ್ರಿಯಾಶೀಲನಾಗಿರುತ್ತಾನೆ. ಮೆದುಳಿನ ಆರೋಗ್ಯಕ್ಕೆ ಅಕ್ರೋಟ್ ಸೇವನೆ ಅತಿ ಉತ್ತಮವಾಗಿದೆ. ಮೆದುಳಿನ ಕ್ರಿಯಾಶೀಲತೆಗೆ ಕೂಡ ಹೆಚ್ಚುತ್ತದೆ.

ಗರ್ಭಿಣಿ ಸ್ತ್ರೀಯರ ಅರೋಗ್ಯಕ್ಕೂ ಕೂಡ ಅಕ್ರೋಟ್ ನ ಸೇವನೆ ಉತ್ತಮವಾಗಿದೆ.

ಗರ್ಭಿಣಿ ಸ್ತ್ರೀಯರು ತಮ್ಮ ಹಾಗೂ ಆರೋಗ್ಯವನ್ನು ಉತ್ತಮವಾಗಿರಿಸಲು ಉತ್ತಮ ಆಹಾರ ಪದ್ದತಿಯನ್ನು ಅನುಸರಿಸಬೇಕಾಗುತ್ತದೆ. ಅಂತಹ ಆಹಾರ ಪದ್ಧತಿಗಳು ತಾಯಿಯ ಹಾಗೂ ಮಗುವಿನ ಆರೋಗ್ಯದ ಮೇಲೆ ನೇರವಾಗಿ ಪರಿಣಾಮವನ್ನು ಬೀರುತ್ತದೆ. ಅಕ್ರೋಟ್ ಸೇವನೆಯು ತಾಯಿ ಮಗುವಿನ ಆರೋಗ್ಯಕ್ಕೆ ಅತಿ ಉತ್ತಮವಾಗಿದೆ. ಅಕ್ರೋಟ್ ಸೇವನೆಯಿಂದ ಮಗುವಿನ ಮೆದುಳಿನ ಬೆಳವಣಿಗೆಗೆ ಬೇಕಾದ ಉತ್ತಮ ಅಂಶಗಳು ದೊರಕುತ್ತದೆ, ಹಾಗೆಯೇ ತಾಯಿಗೆ ತಲೆಸುತ್ತುವಿಕೆ, ವಾಂತಿ ಇಂತಹ ಸಮಸ್ಯೆಗಳಿಂದ ಮುಕ್ತಿಯನ್ನು ನೀಡುತ್ತದೆ. ಹಾಗಾಗಿ ಗರ್ಭಿಣಿ ಸ್ತ್ರೀಯರು ತಮ್ಮ ಆಹಾರದಲ್ಲಿ ಆಕ್ರೋಟ್ ಅನ್ನು ಸೇರಿಸಿಕೊಳ್ಳುವುದು ಅವಶ್ಯಕವಾಗಿದೆ.

ಕೂದಲಿನ ಬೆಳವಣಿಗೆಗೂ ಕೂಡ ಅಕ್ರೋಟ್ ಸೇವನೆ ಉತ್ತಮವಾಗಿದೆ.

ಅಕ್ರೋಟ್ ನಲ್ಲಿ ವಿಟಮಿನ್ ಬಿ ಹಾಗೂ ತಾಮ್ರದ ಅಂಶಗಳಿದ್ದು, ಇದು ಕೂದಲಿನ ಕಪ್ಪು ಬಣ್ಣ ಹಾಗೂ ಉತ್ತಮ ಬೆಳವಣಿಗೆಗೆ ಸಹಕಾರಿಯಾಗಿದೆ. ನಾವು ಕೂದಲ ರಕ್ಷಣೆಯ ಬಗ್ಗೆ ಚಿಂತಿಸುವಾಗ ಬರಿ ಬಾಹ್ಯ ಲೇಪನವು ಸಾಕಾಗುವುದಿಲ್ಲ, ಬದಲಾಗಿ ನಮ್ಮ ಆಹಾರ ಪದ್ಧತಿಯಲ್ಲಿ ಉತ್ತಮ ಅಂಶಗಳನ್ನು ಹೊಂದುವುದು ಅಗತ್ಯವಾಗಿದೆ. ಕೂದಲು ಬೆಳೆಯಲು ಸೋಪು ಹಾಗೂ ಶಾಂಪೂಗಳನ್ನು ಬಳಸಿದರೆ ಸಾಲದು, ಕೂದಲ ಬೆಳವಣಿಗೆಗೆ ಬೇಕಾದ ಸತ್ವಗಳನ್ನು ನಾವು ಆಹಾರ ರೂಪದಲ್ಲಿ ಸ್ವೀಕರಿಸಬೇಕು. ಅದರಲ್ಲಿ ಅಕ್ರೋಟ್ ಸೇವನೆಯು ಕೂದಲ ಬೆಳವಣಿಗೆಗೆ ಉತ್ತಮವಾಗಿದೆ.

ತೂಕ ಇಳಿಸಲು ಕೂಡ ಅಕ್ರೋಟ್ ಸೇವನೆ ಉತ್ತಮವಾಗಿದೆ.

ಅಕ್ರೋಟ್ ಸೇವನೆಯು ತೂಕ ಇಳಿಸಲು ಉತ್ತಮವಾಗಿದೆ. ಅಕ್ರೋಟ್ ಸೇವನೆಯಿಂದ ದೇಹದಲ್ಲಿನ ಕೊಬ್ಬು ಕರಗುತ್ತದೆ. ಹಾಗೆಯೇ ಇದು ಹೊಟ್ಟೆಯ ಭಾಗದಲ್ಲಿ ಶೇಖರಣೆಯಾಗುವ ಕೊಬ್ಬನ್ನು ಕರಗಿಸಲು ಸಹಾಯ ಮಾಡುತ್ತದೆ. ಹಾಗಾಗಿ ಬೆಲ್ಲಿ ಫ್ಯಾಟ್ ಕರಗಿಸಲು ಅಕ್ರೋಟ್ ಸೇವನೆಯು ಉತ್ತಮವಾಗಿದೆ.

ಕ್ಯಾನ್ಸರ್ ರೋಗವನ್ನು ತಡೆಗಟ್ಟುವ ಶಕ್ತಿ ಅಕ್ರೋಟ್ ನಲ್ಲಿದೆ.

ಕ್ಯಾನ್ಸರ್ ಎಂಬ ಹೆಸರು ಕೇಳುತ್ತಿದಂತೆ, ಒಮ್ಮೆ ಭಯವಾಗುವುದು ಸಮಾನ್ಯ. ಅಂತಹ ಕ್ಯಾನ್ಸರ್ ರೋಗವನ್ನು ಬರದಂತೆ ನೋಡಿಕೊಳ್ಳಲು ನಾವು ಅಕ್ರೋಟ್ ಸಹಾಯ ಪಡೆದುಕೊಳ್ಳಬಹುದು. ಅಕ್ರೋಟ್ ನಲ್ಲಿ ಒಮೇಗಾ 3 ಫ್ಯಾಟ್ಟಿ ಆಸಿಡ್ ಹಾಗೂ ವಿಟಮಿನ್ ಇ ಅಂಶಗಳು ಇದ್ದು, ಇದು ಕ್ಯಾನ್ಸರ್ ಕಣಗಳನ್ನು ಕೊಲ್ಲುವ ಶಕ್ತಿಯನ್ನು ಹೊಂದಿದ್ದು, ಕ್ಯಾನ್ಸರ್ ಬಾರದಂತೆ ನೋಡಿಕೊಳ್ಳಲು ಸಹಾಯಕವಾಗಿದೆ.

ಅಕ್ರೋಟ್ ಸೇವನೆಯು ಉತ್ತಮ ಜೀರ್ಣಕ್ರಿಯೆಗೆ ಸಹಕಾರಿಯಾಗಿದೆ.

ನಾರಿನ ಅಂಶಗಳು ಇರುವ ಕಾರಣ ಅಕ್ರೋಟ್ ಸೇವನೆಯು ಸುಲಭ ಜೀರ್ಣಕ್ರಿಯೆಗೆ ಉತ್ತಮವಾಗಿದೆ. ನಾರಿನ ಅಂಶವನ್ನು ಹೊಂದಿರುವ ಆಹಾರ ಪದಾರ್ಥಗಳ ಸೇವನೆಯು ಜೀರ್ಣಕ್ರಿಯೆಯನ್ನು ಸುಲಭಗೊಳಿಸಿ, ಜೀರ್ಣಾಂಗಗಳ ಅರೋಗ್ಯವನ್ನು ಉತ್ತಮವಾಗಿರಿಸುತ್ತದೆ.

ಇನ್ನೂ ಹಲವು ಉಪಯೋಗಗಳನ್ನುನಾವು ಅಕ್ರೋಟ್ ಸೇವನೆಯಿಂದ ಪಡೆಯಬಹುದಾಗಿದೆ. ಸಂಧಿವಾತದ ಸಮಸ್ಯೆ ಇರುವವರು ನಿತ್ಯವು ಅಕ್ರೋಟ್ ಸೇವಿಸುವುದು ಉತ್ತಮವಾಗಿದೆ. ಇದು ಮೂಳೆ ಹಾಗೂ ಕೀಲು ಗಳ ಆರೋಗ್ಯಕ್ಕೆ ಅತಿ ಉತ್ತಮವಾಗಿದೆ. ಅಂತೆಯೇ ದೃಢ ಹಲ್ಲುಗಳ ಅರೋಗ್ಯಕ್ಕೂ ಕೂಡ ಅಕ್ರೋಟ್ ಸೇವನೆಯು ಉಪಯುಕ್ತವಾಗಿದೆ. ಅಸ್ತಮಾ ಅಥವಾ ದಮ್ಮಿನ ಸಮಸ್ಯೆಗಳು ಇದ್ದವರು ಕೂಡ ಅಕ್ರೋಟ್ ಅನ್ನು ಆಹಾರವಾಗಿ ಸೇವಿಸುವುದು ಅನುಕೂಲಕರವಾಗಿದೆ. ಪುರುಷರಲ್ಲಿ ವೀರ್ಯಾಣುಗಳ ಕೊರತೆ ಇದ್ದಲ್ಲಿ, ಅಕ್ರೋಟ್ ಸೇವನೆಯು ಉತ್ತಮ ಲಾಭವನ್ನು ನೀಡುತ್ತದೆ. ಪ್ರತಿದಿನ ಅಕ್ರೋಟ್ ಸೇವನೆಯಿಂದ ವೀರ್ಯಾಣುಗಳ ಉತ್ಪತ್ತಿಯಾಗುತ್ತದೆ. ಎಲ್ಲಾ ಸಮಸ್ಯೆಗಳಿಗೂ ಉತ್ತಮ ಪರಿಹಾರವನ್ನು ನೀಡುವ ಈ ಅಕ್ರೋಟ್ ಶಕ್ತಿವರ್ಧಕವೂ ಕೂಡ ಆಗಿದೆ. ದೇಹಕ್ಕೆ ಬೇಕಾದ ಸಕಲ ಪೋಷಕಾಂಶಗಳನ್ನು ಒದಗಿಸುತ್ತದೆ. ಶರೀರದ ಉತ್ತಮ ಬೆಳವಣಿಗೆಗೆ ಸಹಾಯಕವಾಗಿದೆ. ಮಕ್ಕಳಿಗೆ ಪ್ರತಿದಿನ ಅಕ್ರೋಟ್ ಅನ್ನು ನೆನೆಸಿ, ತಿನ್ನಲು ಕೊಡಬೇಕು. ಇದು ಮಕ್ಕಳ ಸರ್ವತೋಮುಖ ಬೆಳವಣಿಗೆಗೆ ಉತ್ತಮವಾಗಿರುತ್ತದೆ. ಎಲ್ಲರೂ ಕೂಡ ಅಕ್ರೋಟ್ ಸೇವನೆ ಮಾಡಬೇಕು, ಇದು ಅರೋಗ್ಯವರ್ಧಕ ಅಷ್ಟೇ ಅಲ್ಲದೇ ದೇಹದ ಬೆಳವಣಿಗೆಯಲ್ಲಿ ಉತ್ತಮ ಪಾತ್ರವನ್ನು ವಹಿಸುತ್ತದೆ. ಹಾಗೆಯೇ ಅಡುಗೆಯಲ್ಲೂ ಕೂಡ ಅಕ್ರೋಟ್ ಬಳಕೆಯನ್ನು ಮಾಡಲಾಗುತ್ತದೆ. ಪಾಯಸ ಹಾಗೂ ಸಿಹಿ ಪದಾರ್ಥಗಳ ತಯಾರಿಕೆಯಲ್ಲಿ ಹೆಚ್ಚಾಗಿ ಬಳಸಲಾಗುತ್ತದೆ. ಐಸ್ ಕ್ರೀಮ್ ಗಳ ತಯಾರಿಕೆಯಲ್ಲಿ ಕೂಡ ಹೆಚ್ಚಾಗಿ ಈ ಅಕ್ರೋಟ್ ಗಳ ಬಳಕೆಯಾಗುತ್ತದೆ. ಇನ್ನೂ ಅಕ್ರೋಟ್ ಎಣ್ಣೆ ತಯಾರಿಕೆಯಲ್ಲಿ ಕೂಡ ಬಳಸಲಾಗುತ್ತದೆ.

ಇಂದಿನ ಲೇಖನದಲ್ಲಿ ಅಕ್ರೋಟ್ ಗೆ ಸಂಬಂಧಪಟ್ಟ ಅನೇಕ ಉಪಯುಕ್ತ ವಿಚಾರಗಳ ಬಗ್ಗೆ ವಿವರಿಸಲಾಗಿದೆ, ಒಮ್ಮೆ ಓದಿ, ಅರಿತುಕೊಂಡು ಅಕ್ರೋಟ್ ಸೇವನೆಯಿಂದ ಸಿಗುವ ಲಾಭಗಳನ್ನು ಪಡೆದುಕೊಳ್ಳಿರಿ ಎಂಬುದು ಈ ಲೇಖನದ ಆಶಯ.

ನಿಮ್ಮ ಅನಿಸಿಕೆ, ಮತ್ತು ಅಭಿಪ್ರಾಯಗಳನ್ನು ಕಾಮೆಂಟ್ ಮೂಲಕ ಹಂಚಿಕೊಳ್ಳಿ! ಹಾಗೂ, ಹೆಚ್ಚು ಮಾಹಿತಿಪೂರ್ಣ ಲೇಖನಗಳಿಗಾಗಿ GruhaSnehi.com ಭೇಟಿ ನೀಡಿ.

ಡಿಸ್ಕ್ಲೈಮರ್: ಈ ಬ್ಲಾಗ್‌ನಲ್ಲಿ ನೀಡಿರುವ ಮಾಹಿತಿಯು ಕೇವಲ ಸಾಮಾನ್ಯ ಉದ್ದೇಶಗಳಿಗಾಗಿ. ವೈದ್ಯಕೀಯ, ಹಣಕಾಸು, ಹೂಡಿಕೆ ಅಥವಾ ಕಾನೂನು ಸಲಹೆಗೆ ತಜ್ಞರನ್ನೇ ಸಂಪರ್ಕಿಸಿ. ಈ ಬ್ಲಾಗ್‌ನಲ್ಲಿ ಶೇರ್ ಮಾಡಲಾದ ಯಾವುದೇ ಆಹಾರ ಅಥವಾ ಪಾಕವಿಧಾನಗಳನ್ನು ಬಳಸುವ ಮೊದಲು, ನಿಮ್ಮ ಆರೋಗ್ಯ ಸ್ಥಿತಿಗೆ ಅನುಗುಣವಾಗಿ ಅಥವಾ ಯಾವುದೇ ಅಲರ್ಜಿಯ ಕುರಿತು ತಜ್ಞರ ಸಲಹೆ ಪಡೆಯಲು ಶಿಫಾರಸು ಮಾಡಲಾಗುತ್ತದೆ. ಈ ಪೋಸ್ಟ್‌ನಲ್ಲಿ ಬಳಸಲಾದ ಯಾವುದೇ ಚಿತ್ರಗಳು ಅಥವಾ ಲೋಗೋಗಳು ಆಯಾ ಮಾಲೀಕರ ಆಸ್ತಿಯಾಗಿದ್ದು, ವಿವರಣಾತ್ಮಕ ಉದ್ದೇಶಗಳಿಗಾಗಿ ಮಾತ್ರ ಬಳಸಲಾಗುತ್ತದೆ.

Spread the love